5. Haydovchilik guvohnomasi toifalari

Milliy haydovchilik guvohnomasi xalqaro standartlar tavsiyalari asosida plastik materialdan tayyorlanadi. Guvohnoma o‘lchami 54 × 86 mm. Guvohnoma rangi — pushti. Davlat tili lotin alifbosida qo‘llaniladi. Seriya raqami ikki harfdan, raqami esa olti xonali sondan iborat.

Milliy haydovchilik guvohnomasida jismoniy shaxsning shaxsiy identifikatsiya raqami (JShShIR) hamda qurilmalar o‘rtasida kontaktsiz ma’lumot almashishni ta’minlovchi maxsus elektron belgi (NFC Smart-karta) mavjud.

Milliy haydovchilik guvohnomasining plastik shakli quyidagi himoya vositalariga ega:

O‘zbekiston Respublikasi Davlat gerbi tasviridagi gologramma, turli burchak ostida ko‘rinishini o‘zgartiradi;

Mikro matn — «Haydovchilik guvohnomasi Водительское удостоверение Driving licence», o‘lchami 30 mikrongacha;

Ultrabinafsha qoplama;

«UZ» yozuvli optik o‘zgaruvchan bo‘yoq, egilganda bir rangdan boshqasiga o‘tadi;

Gilyosh — qalinligi 40–70 mkm bo‘lgan, egriligi doimiy o‘zgarib turadigan to‘lqinsimon chiziqlar tarmog‘i ko‘rinishidagi naqsh;

Plastik shaklning seriya raqami lazer gravirovkasi.

Milliy haydovchilik guvohnomasining old tomonida «Haydovchilik guvohnomasi», «Водительское удостоверение», «Driving licence» so‘zlari, O‘zbekiston Respublikasi Davlat bayrog‘i tasviri, O‘zbekiston Respublikasi nomi davlat, rus va ingliz tillarida joylashtiriladi hamda Yo‘l harakati to‘g‘risidagi Konvensiyaning (Vena, 1968-yil 8-noyabr) 6-ilovasi 4-bandining 1–3, 4a–4d, 5–7, 9-kichik bandlari hamda 5-bandining 8-kichik bandida nazarda tutilgan ma’lumotlar majburiy ravishda ko‘rsatiladi, fotosurat uchun joy ajratiladi.

Orqa tomonida Yo‘l harakati to‘g‘risidagi Konvensiyaning (Vena, 1968-yil 8-noyabr) 6-ilovasi 4-bandining 9 va 12-kichik bandlari hamda 5-bandining 10 va 11-kichik bandlarida nazarda tutilgan ma’lumotlar majburiy ravishda ko‘rsatiladi.

1–12-bandlarda nazarda tutilgan ma’lumotlar kiritiladi.

Alohida qaydlar uchun joy ajratiladi.

A, B, C, D, BE, CE va DE toifalari tegishli piktogrammalar bilan ko‘rsatiladi.

Avtomototransport vositasi roʻyxatdan oʻtkazilganligi toʻgʻrisidagi guvohnoma xalqaro standartlar tavsiyalari asosida 54 × 86 mm o‘lchamdagi plastik materialdan tayyorlanadi.

Avtomototransport vositasi roʻyxatdan oʻtkazilganligi toʻgʻrisidagi guvohnoma rangi — ko‘k. Davlat tili lotin alifbosida qo‘llaniladi. Seriya raqami ikki harfdan, raqami esa olti xonali sondan iborat.

Avtomototransport vositasi roʻyxatdan oʻtkazilganligi toʻgʻrisidagi guvohnomada jismoniy shaxs uchun shaxsiy identifikatsiya raqami (JShShIR), yuridik shaxs uchun soliq to‘lovchining identifikatsiya raqami (STIR) hamda qurilmalar o‘rtasida kontaktsiz ma’lumot almashishni ta’minlovchi maxsus elektron belgi (NFC Smart-karta) mavjud.

Avtomototransport vositasi roʻyxatdan oʻtkazilganligi toʻgʻrisidagi guvohnomaning plastik shakli quyidagi himoya vositalariga ega:

O‘zbekiston Respublikasi Davlat gerbi tasviridagi gologramma, turli burchak ostida ko‘rinishini o‘zgartiradi;

Mikro matn — «Avtomototransport vositasi roʻyxatdan oʻtkazilganligi toʻgʻrisida guvohnoma Свидетельство о регистрации автомототранспортного средства Vehicle licence», o‘lchami 30 mikrongacha;

Ultrabinafsha qoplama;

«UZ» yozuvli optik o‘zgaruvchan bo‘yoq, egilganda bir rangdan boshqasiga o‘tadi;

Gilyosh — qalinligi 40–70 mkm bo‘lgan, egriligi doimiy o‘zgarib turadigan to‘lqinsimon chiziqlar tarmog‘i ko‘rinishidagi naqsh;

Guvohnoma plastik shaklining seriya raqami lazer gravirovkasi.

Guvohnomaning old tomonida «Avtomototransport vositasi roʻyxatdan oʻtkazilganligi toʻgʻrisida guvohnoma», «Свидетельство о регистрации автомототранспортного средства», «Vehicle licence» so‘zlari, O‘zbekiston Respublikasi Davlat bayrog‘i tasviri hamda «O‘zbekiston Respublikasi» so‘zlari davlat, rus va ingliz tillarida joylashtiriladi. Davlat raqam belgisi, marka, model, rang, avtomototransport vositasi egasi to‘g‘risidagi ma’lumotlar (familiyasi, ismi, otasining ismi yoki tashkilot nomi, manzili), guvohnoma berilgan sana, Yo‘l harakati xavfsizligi boshqarmasi bo‘linmasi, jismoniy shaxs uchun JShShIR, yuridik shaxs uchun STIR majburiy ravishda ko‘rsatiladi.

Guvohnomaning orqa tomonida avtomototransport vositasi to‘g‘risidagi quyidagi ma’lumotlar majburiy ravishda ko‘rsatiladi: avtomototransport vositasining ishlab chiqarilgan yili, turi, kuzov/shassi raqami, to‘liq massasi, yuksiz massasi, toifasi va dvigatel quvvati, yoqilg‘i turi, haydovchi bilan birga o‘rindiqlar soni, tik turish joylari soni, alohida qaydlar.

Texnik ko‘rikdan o‘tganlik taloni 54 × 86 mm o‘lchamdagi to‘rtburchak shakldagi qog‘ozdan tayyorlanadi. Qog‘oz tarkibi 100 foiz paxtadan iborat bo‘lib, zichligi kvadrat metriga 140±5 grammni tashkil etadi. Qog‘oz qatlamida ultrabinafsha nurlar ostida ko‘rinadigan ko‘k va och rangli tolalar, shuningdek yorug‘lik nurlari ostida yaqqol ko‘rinadigan «paxta chanog‘i» ko‘rinishidagi umumiy suv belgisi mavjud.

Bosma usuli — ofset. Mintaqa kodi, ikki harfdan iborat seriya va olti xonali raqam qo‘llaniladi.

Blank quyidagi maxsus himoya vositalariga ega:

Kimyoviy ta’sirga chidamli bo‘yoq qo‘llanilgan, nusxa ko‘chirish va skanerlashga qarshi yuzadagi katakchalarda ingichka chiziqlar mavjud. Tasvir chiziqlari bir rangdan boshqasiga o‘tishda silliq qo‘shilib ketadi. Kattalashtirilganda mikro matn, ultrabinafsha nurlar ostida ko‘rinmaydigan tasvirlar va olti xonali raqam ko‘rinadi. Maxsus bo‘rtma va botiq elementlarga ega.

Matn davlat tilida lotin yozuvida berilgan.

Old tomonida avtomototransport vositasining markasi va davlat ro‘yxatidan o‘tkazilgan raqam belgisi ko‘rsatiladi.

Orqa tomonida o‘tkazilgan texnik ko‘rik natijasi, joriy va navbatdagi texnik ko‘rikdan o‘tish sanalari ko‘rsatiladi.

Talondagi yozuvlar Yo‘l harakati xavfsizligi davlat xizmati bo‘linmasining mansabdor shaxsi tomonidan kiritiladi hamda imzo va maxsus muhr bilan tasdiqlanadi.